تاند- افغان طالبانو نن /چهارشنبه/ د خندق په نوم پسرلني عملیات اعلان کړل. د دې ډلې د ۲۰۱۷ کال پسرلني عملیات منصوري عملیا نومېدل.
طالبانو په یوه خبرپاڼه کې، چې نن یې خپره کړه، ویلي چې د خندق عملیاتو تمرکز به د امریکايي غاصبانو ځپلو، وژلو او نیولو ته وي او په دوهم ګام کې به د دې حملو مخه د امریکایانو کورنیو ملاتړ کوونکو خوا ته وي.
تمه کېده چې د افغانستان د ولسمشر د سولې له وړاندیزونو وروسته به طالبان د جنګ لار پرېږدي او د سولې خبرې به پیل کړي خو دې ډلې یو وار بیا د تېرو کلونو په شان جګړه اعلان کړه.
د طالبانو په خبرپاڼه کې ویل شوي چې حملې د دې ډلې نظامي کمیسیون تنظیم کړي دي.
تر دې اعلان مخکې هم طالبانو حملې کمې کړې نه وې. په وروستیو ورځو کې د طالبانو او داعشیانو په حملو کې په سلګونو ملکي او پوځي افغانان وژل شوي دي.
تر ټولو خونړۍ حمله د روانې اوونۍ د یکشنبې په ورځ /اپریل ۲۲/ د کابل په دشت برچي کې د رای ورکولوونکو د نوم لیکنې پر یوه مرکز وه چې تر ۶۰ زیات ملکیان پکې ووژل شول.
پرون /سې شنبه/ په فراه او غزني ولایتونو کې لږترلږه ۱۱ پولیس او سرتېري ووژل شول.
د دوشنبې په ورځ طالبانو په بادغیس ولایت کې ۱۸ پولیس او سرتېري ووژل.
ټیک یې دړې وړې دا چارې دزرګر وینم
سرې ترګې خومارې باڼه یې ځلندر وینم
سولې ته مو ډېرې هیلې وي خو پرون چې د پاکستان د خارجه وزارت او د امریکا د خارجه وزارت د استازو تر منځ خبرې بې نتیجې پای ته ورسېدې نن د پاکستان افغاني ملېشو (طالبانو) بیا د افغان وژنې عملیات اعلان کړل. لعنت دې وي او د افغانانو په وژونکو دې وي.