تاند- د غزني ښاریانو نن /سې شنبه/ سهار رسنیو ته وویل چې طالبان د ښار تقریباً له ټولو برخو وتلي خو ګڼو دولتي ودانیو ته یې اور اچولی دی.
دوی وايي چې اوس له ښاره دباندې په اسفندې، نوغي او همداراز د خوږیاڼي ولسوالي په شاوخوا کې جګړه روانه ده.
ځینې شاهدان وايي چې روغتون ته د ۱۰۰ تنو مړي او شاوخوا ۱۵۰ ټپیان وړل شوي دي.
اکثره خلک په روغتون کې د درملو او ځای د کمښت شکایت کوي.
امنیتي چارواکي هم د غزني ښار په جګړو کې د ۱۰۰ پولیسو وژل کېدا تاییدوي. د ملي اردو د ځواکونو د تلفاتو په اړه تراوسه کره معلومات نشته خو د ۵۰ کومانډو له بې درکه شوې قطعې څخه ۳۵ ژوندي دایکنډي ولایت ته رسېدلي دي.
افغان امنیتي چارواکي د طالبانو تلفات تر دې خورا ډېر یادوي او وايي چې اکثره پاکستانیانیان، چیچنیایان او نور بهرنیان دي.
پرون غزني ته ۱۰۰۰ تنه نور ځواکونه واستول شول.