تاند- طالبان وايي چې د افغانستان د سولې له ځانګړي استازي زلمي خلیلزاد سره یې مفصلې خبرې کړي او د خبرو له نتیجې راضي دي.
خلیلزاد سیمې ته د دوهم سفر په لړ کې تراوسه پورې لږترلږه دوه ځلې له طالبانو سره کتلي او د خپلو خبرو د پایلو په اړه یې د افغانستان له ولسمشر سره مشوره کړې ده.
له طالبانو سره د خلیلزاد وروستۍ خبرې پرون /جمعه/ پای ته ورسېدې او څو سرچینو لوېدیځو رسنیو ته ویلي چې د خبرو نتیجو ته دواړه خواوې خوشبینه دي.
خو هیڅ خوا تر دې دمه رسماً د خبرو د نتیجې او جزییاتو په اړه څه ویلي نه دي.
سرچینې وايي، له طالبانو سره د خلیلزاد د خبرو په وروستي پړاو کې له ګوانتنامو بند څخه خوشي شویو طالب مشرانو لکه ملا فضل او ملا خیرخواه هم برخه لرله.
طالب سرچینې وايي چې دوی د خبرو په لړ کې هڅه وکړه چې امریکا له افغانستانه د خپلو پوځیانو د ایستلو مهالوېش اعلان کړي.
تر دې وړاندې د طالبانو د قطر د دفتر ویندوی سهیل شاهین هم په مسکو کې ویلي و«کله چې موږ د دوی د ځواکونو د وتلو پر سر موافقې ته ورسېږو، بیا دوهم پړاو ته داخلېږو چې د سولې د راوستلو او په افغانستان کې د حکومت په اړه د افغانانو ترمنځ خبرې دي.»
راپورونه وايي چې نن /شنبه/ خلیلزاد بیا دوحې ته تللی چې له طالبانو سره وویني.
په همدې حال کې د سولې د عالي شورا مرستیال حاجي دین محمد هم نن وویل، داسې ښکاري چې امریکا له طالبانو سره په وروستیو خبرو کې له افغانستانه د خپلو پوځیانو د ایستلو پر مهالوېش موافقې ته رسېدلې ده.
د یو بل خبر له مخې، د اجرايي ريیس دوهم مرستیال محمد محقق ادعا کړې چې خلیلزاد سیمې ته د دوهم سفر په لړ کې د زابل ولایت خاک افغان ولسوالي ته تللی او د طالبانو د پخواني مشر او موسس ملا عمر له زوی ملا یعقوب سره یې لیدلي دي.
طالبانو دا ادعا رد کړې او امریکا په دې اړه تراوسه څه نه دي ویلي.