عبدالله: په غوڅ اکثریت بریالی یم، پر ملت د یو لوی درغلګر او دروغجن لوبه نوره ختمه شوه

تاند، دوشنبه، د میزان ۸مه: د ولسمشرۍ نوماند عبدالله عبدالله ادعا کوي چې د ۲۰۱۹ کال ولسمشریزې ټاکنې دویم پړاو ته نه ځي او دا وار ټاکنې یې په غوڅ اکثریت ګټلې دي.

 ښاغلی عبدالله وايي، تېر ځل د ۲۰۱۴ کال ټاکنې یې هم ګټلې وې، خو د ملي منافعو په خاطر یې ګډ حکومت ومانه.

نوموړی چې نن ماسپښين په خبري کنفرانس کې ډېر ډاډه ښکارېده وايي، ټاکنې یې ګټلې دي او له پاکو رایو پرته بل هیڅ شی ورته د منلو نه دی: (( بې بایومتریکه رایې باطلې دي، تېر ځل مو د مصلحتونو له مخې قرباني ورکړې وه او یو لوی دروغجن او درغلګر پنځه کاله د افغانانو په سرنوشت لوبې وکړې. ))

عبدالله عبدالله زیاته کړه، د ولسمشرۍ ټاکنو ته ګواښونه زیات وو، خو بیا هم د خلکو د ګډون مننه کوي: (( که افغانانو ته شرایط برابر شي، دوی د زعیم د انتخاب لپاره یوازېنۍ لاره ټاکنې ګڼي.))

عبدالله عبدالله چې تېرو دوه دورو په ولسمشریزو ټاکنو کې د یو جنجالي نوماند په ډول مطرح و، دا ځل یو وار بیا په داسې حال کې د نه منلو ګواښ کوي چې ولسمشر غني ویلي دي، که دا وار بریالی شي، اجرائیه ریاست به په هیڅ شان ونه مني، ځکه دغې نسخې افغانستان ته ګټه ونه کړه .