علي احمد مهر: د طالبانو له درکه یو میلیارد ډالر نن پاکستان ته راورسېدل

تاند – پاکستانی ژورنالست، علي احمد مهر، وایي چې د هغو میلیاردونو ډالرو له جملې څخه یو میلیارد ډالر نن پاکستان ته ورسېدل چې د طالبانو په سر دغه هېواد ته منل شوي دي.

ویل کیږي چې دا پیسې د دې لپاره پاکستان ته ورکول کېږي چې افغان طالبان یې خبرو ته حاضر کړل.

ښاغلي مهر دا خبرې له الجزیره عربي تلوېزیون سره په یوه ګردي مېز کې چې له اسلام اباد څخه، ده، له دوحې څخه افغان سیاستوال ډاکترعمر زاخېلوال او له متحده ایالاتو څخه ګورډن ادمز په کې برخه لرله، وکړې.

دغه پاکستاني خبریال وویل، «د طالبانو هيڅ زړه نه و، چې د خبرو لپاره ابو ظبي ته لاړ شي، خو د پاکستان په هڅونه هلته لاړل، ځکه يې بېرته له هغه ځايه په شاتګ وکړ او بيا اراده نه لري چې په ابوظبي، جدې او يا اسلام اباد کې مذاکرات وکړي،»

علي احمد مهر د بحث د چلوونکي د دې پوښتنې په ځواب کې چې ځينې راپورونه وايي چې پاکستان ته درې مليارده ډالر ومنل شول، ځينې نور شپږ میلیارده يادوي، وویل، «هو، او د دغو ملياردونو یو مليارد ډالر نن راورسېدل، او نور په را روانو دوه اونیو کې رارسيږي،»

ویل کیږي چې پاکستان په ۲۰۰۱ کال کې هم د طالبانو د خرڅولو له لارې له غربي نړۍ څخه په میلیاردونو ډالر ترلاسه کړل چې یوه احصایه دغه اندازه ۳۲ میلیارده ډالر ښیي.

له هغه وړاندې د شوروي بلاک په وړاندې د پخوانیو افغان جهادي تنظیمونو د جنګولو له لارې له غربي او عربي هېوادونو څخه د ډېرو پیسو د ترلاسه کولو خبره کیږي، خو داسې ښکاري چې دا تازه ۶ میلیارد ډالره به د «جهاد افغانستان، دفاع پاکستان» د شعار په مصداق د پاکستان د شړېدونکي اقتصاد د ټینګښت په برخه کې غټ رول ولوبوي.

د افغانستان دا ګاونډی په داسې حال کې د خپل کرلي فصل د دې تازه حاصل د ترلاسه کولو خبر ورکوي چې ویل کیږي یوازې په وروستیو ۱۷ کالونو کې د افغانستان په جنګ کې خواوشا دوه لکه افغانان وژل شوي، په لکونو نور معیوب او معلول او په میلیونونو کډه کولو ته مجبور شوي دي. (له الجزیرې سره د ګردي مېز ویډیو)