خبریال: ج. وقار- د غزني ولایت د ګیلان ولسوالۍ په امنیه قومندان انجنیر لطف الله کامران نن غرمه شاوخوا دولس بجې ځانمرګی برید شوی، خو نوموړي او ساتونکو ته یې زیان نه دی اوښتی.
د غزني د امنیې قومندانۍ ویاند فهیم امیري تاند ته وویل چې برید د غرمې په دولس بجې شوی چې په پایله کې یې د یوې مېرمنې په ګډون اووه تنه ملکي وګړي ټپيان شوي دي.
نوموړي وویل چې کامران او ملګرو ته یې کوم زیان نه دی اوښتی.
د هغه په وینا ځانمرګی په موټر سایکل سپور و چې د کامران د موټرو کاروان په رارسېدو یې ځان ته چاودنه ورکړه.
انجنیر لطف الله کامران لومړی کس و چې د غزني په اندړو ولسوالۍ کې یې د وسله والو طالبانو په ضد ولسي پاڅون وکړ.
نوموړی یو نیم کال وړاندې د اندړو ولسوالۍ په حبیب ګوډلو کلي کې د سړک غاړې ماین چاودنې مرګونی ژوبل کړ چې له څه درمنلې وروسته خپل کار ته ستون شو.
Allah di da loi Afghanistan dushmanan muradar ki ao Engineer sahib ta da Loi ao bakhshunki Allah nor umar hum warki