تاند، سه شنبه، د سنبلې ۱۲مه: ولسمشر محمد اشرف غني د کابل د بهرنیانو پر میلمستون ګرین ویلیج کمپ د طالبانو برید ته په غبرګون کې ویلي چې زموږ پر ضد د طالبانو جګړه بشري جنایت دی.
ښاغلی غني دا څرګندونې وروسته تر هغه کوي، چې تېره شپه د کابل ښار د نهمې امنیتي حوزې اړوند قابل بای سیمه کې د بهرنیانو پر یو کمپ د طالبانو موټر بم او ډله ییز برید له ۱۳۵ زیاتو کسانو ته مرګ ژوبله واوړوله.
ارګ د دې برید په تړاو یوه خبر پاڼه کې وایي چې طالبان د پردیو په لارښوونه افغانان په نښه کوي.
په دغه اعلامیه کې د غني له قوله ویل شوي زموږ د خلکو او هیواد پر ضد د طالبانو جګړه بشري جنایت دی: (( طالبان او رهبري یې له افغانستان څخه بهر د پردیو کړیو په واک کې ده او د هغوی په لارښوونه زموږ هیواد ورانوي او زموږ خلکو ته زیان رسوي.))
ولسمشر یاد برید غندلی او زیاتوي، چې طالبانو د افغان پوځ په وړاندې د جګړې توان له لاسه ورکړی دی او اوس غواړي یوازې ملکیان په نښه کړي.
دغه برید چې مسؤلیت یې طالبانو په غاړه اخیستی د افغانستان د کورنیو چارو وزارت په وینا ۱۶ تنه په کې وژل شوي او ۱۱۹ نور ټپيان شوي چې ملکي وګړي او د دغه کمپ کار کوونکي په کې شامل دي.
خو طالبانو په یوه اعلامیه کې ویلي چې دوي ګڼو بهرنیانو ته په پروني برید کې مرګ ژوبله اړولي ده.
د طالبانو د صلحی ادعا دروغ ده ، که رښتیا دوی صلحه غواړی نو اول دی اوربند اعلان کړی ، دافغان وژنی نه دی لاس واخلی او بیا د افغانستان د اسلامی جمهوری دولت سره خبری پیل کړی