تاند، دوشنبه، د ثر ۸مه: ولسمشر غني د ثور د اتمې یا د مجاهدینو د بریا د ورځې په مناسبت خپاره کړي پیغام کې ویلي، افغانان جګړه نه بلکې سوله او خوشالي غواړي.
ولسمشر غني په دغه پیغام کې ویلي، سوله د افغانانو اصلي غوښتنه ده او دوی له جګړې او شرارت څخه کرکه لري او افغان حکومت به هم ولس ته د سولې راوستلو هڅې ونه سپموي.
ولسمشر ټینګار کړی چې طالبان باید د افغانستان له اصیلو بچیانو وپوښتي چې دوی څه غواړي: (( زموږ د خلکو ځواب به طبعا همدا وي چې د ټولې نړۍ د خلکو په څېر موږ هم جګړه او تباهي نه غواړو.))
ولسمشر ویلي، تېرو تحمیلي جګړو د افغانستان زېربناوي او اساسات له منځه وړي دي خو اوس افغان حکومت د سولې لپاره اساسي او عملي ګامونه پورته کړي دي: (( موږ په نوي پړاو کې یوازې په ملي یووالي له تحمیلي جګړې وتلی او سولې ته رسېدلی شو.))
ولسمشر د کورونايي وضعیت د مهار لپاره هم یو وار بیا د حکومت په لازمو تدابیرو ټینګار کړی دی او ویلي یې دي لکه څنګه چې د جهاد په وخت کې افغانان په یو صف ولاړ وو، داسې د کورونا پر ضد هم یو شان مبارزه کې ولاړ دي.
د ثور اتمه د مجاهدینو د بریا او د شوروي له ماتې سره سمون خوري چې ۲۸ کاله وړاندې د ۱۳۷۱ د ثور په اتمه مجاهدینو بری ترلاسه کړ، خو دغه ورځ وروسته بیا بیرته په یو خونړي کورني جنګ بدله شوه.
اول دخلکو سخه وپوشتل شی چی تاسو او عبدالله غواری که نه