غني: طالب مشران په میلیونرانو بدل شوي، که نظام چپه کوي پر ضد یې درېږو

تاند، پنجشنبه، د دلوې ۳مه: ولسمشر غني د داووس کنفرانس ته په وینا کې ویلي، که طالبان د نظام د راپرځولو اراده ولري نو پر وړاندې به یې ټینګ ودرېږي.

ولسمشر غني په سویس کې د نړیوالې اقتصادي مجمع حاشیوي ناستې ته په وینا کې ویلي، طالبان له جګړې ستړي دي خو رهبران یې باید دغه ستړیا واک ته د رسېدو لپاره ونه کاروي.

ولسمشر ویلي، طالب مشرانو چې په دوحه کې څلور او پنځه میرمنې ځانته نکاح کړې دی له ژوند څخه خوند اخلي او اوس په میلیونرانو بدل شوي دي.

ولسمشر د افغان جګړې د پای ته رسولو په اړه ټینګار کړی او ویلي یې دي د شلمې او یوویشتمې پیړۍ هیڅ جګړه له سیاسي حل پرته نه ده ختمه شوې.

دا په داسې حال کې ده چې د پاکستان لومړي وزیر هم ویلي چې پاکستان به نور د سیمه ییزو لانجو برخه نه ګرځي او د افغانستان په جګړه کې یې دوه ځله لوی تاوان کړی دی.