تاند، چهارشنبه، د اسد ۹ مه: ولسمشر غني د ایران د انرژۍ له وزیر رضا اردکانیان سره لیدنه کې ټینګار کړی چې چابهار باید د یو سوداګریز او ټرانزیټي بندر په توګه د افغانستان، ایران او سیمې د ودې او پراختیا سبب شي.
د دې لیدنې په تړاو له ارګه تاند ته استول شوې خبرپاڼه کې راغلي، ولسمشر غني له اردکانیان سره د انرژۍ او زېربناو د توسعې برخه کې د دوه اړخیزو همکاریو په پراختیا هم ټینګار کړی او زیاته کړې یې ده چې دواړه هېوادونه باید د طبیعي انرژۍ څخه د ګټې اخیستنې لپاره مناسبې تګلارې تر لاس لاندې ونیسي.
لیدنه کې د ایران د انرژۍ وزیر، ولسمشر غني ته ویلي، چې ایران او افغانستان له بادي او لمریزې انرژۍ څخه د استفادې ښه ظرفیتونه لري او هېواد یې چمتو دی چې دې برخه کې له کابل سره خپلې تجربې شریکې کړي.