تاند، چهارشنبه، د حمل ۲۷مه: ولسمشر غني، ملت ته په وینا کې له طالبانو غوښتي چې د کورونا د مخنیوي د هڅو په بریالي کولو کې دې د ملګرو ملتونو، افغانانو او نړیوالو سازمانونو خبره واوري او اوربند دې وکړي.
ولسمشر غني ویلي، د کورونا په اړه یې له نړیوالو سازمانونو سره د مرستو د همغږۍ یوه طرحه جوړه کړې ده چې پنجشنبه به د کابینې په غونډه کې تصویب شي او له نړیوالو به وغواړي چې د کورونا پر ضد مبارزه کې له افغانستان سره خپلې ژمنې تعدیل کړي.
ولسمشر غني وویل، افغان حکومت د کرونا د نهايي یا فلاکت نقطې سنجش کړی دی او په دې تړاو به پلانونه ګام په ګام عملي کړي.
هغه همدا راز ویلي، د فلاکت له پړاو وروسته به حکومت د کورونا له وبا څخه د راپیدا شویو زیانونو جبران پيل کړي: (( مرستې به ټول هیواد ته رسوو، د ناروغانو د تجرید مراکز به ټول هیواد کې فعال شي، د ډاکټرانو او طبي پرسونل امتیازات مو هم تصویب کړي دي له خلکو غواړم که لویه غمیزه نه غواړئ نو په کور پاتې شئ.))
ولسمشر زیاته کړې امنیت شورا د امنیتي وسله والو ځواکونو په لیکو کې د کورونا د مخنیوي جدي تدابیر نیولي دي.
دا په داسې حال کې ده چې نن د عامې روغتیا وزیر ولسي جرګې ته په وینا کې ویلي، که خلک همکاري ونه کړي او لارښوونې په پام کې ونه نیسي نو کورونا به لوی ناورین راپورته کړي.