غني: که پاکستان د کابل له دښمنۍ لاس وانخلي د اسیا فقیر ترین هېواد به شي

تاند، شنبه، د سنبلې ۳۰مه: ولسمشر غني او د راتلونکو ولسمشریزو ټاکنو نوماند محمد اشرف غني یو وار بیا پر پاکستان غږ کړ که د افغانستان په تړاو خپلو پالیسیو کې تغیر رانه ولي، د جنوبي اسیا تر ټولو فقیر هېواد باندې به بدل شي.

ولسمشر غني نن په کابل کې د شمشاد په نوم له یو خصوصي ټلویزیون سره په ځانګړې مرکه کې وویل، پاکستان اړ دی چې د افغانستان او سیمې په تړاو د جګړې د هڅونې پالیسي بدله کړي، ځکه د سیمې تر ټولو لوی اقتصادي فرصتونه به یې له لاسه ووځي.

ولسمشر زیاته کړه، پاکستان له سخت اقتصادي بحران سره مخ او اتیا زره میګاواټه بریښنا ته اړ دی او دا له افغانستان سره په دښمنۍ نه شي ترلاسه کولی.

ولسمشر د ټاپي پروژې په تړاو د پاکستان د لېوالتیا کمېدو په هکله وویل: (( پاکستان خپل اقتصاد منځنۍ اسیا ته له لار موندلو پرته نشي تکمیلولی، نه هم له خپلو منابعو څخه اتیا زره میګاواټه بریښنا پوره کولی شي، اړ دی چې دا له منځنۍ اسیا واخلي او دا کار له افغانستان سره په دښمنۍ نه شي کولی.))

ولسمشر غني زیاته کړه، له پاکستان سره پر ډیورنډ هیڅ ډول معامله نده شوې بلکې په وینا یې افغانان خپل تاریخ نه هیروي او خپل قدرت ته انتظار کوي.

ولسشمر غني دا خبرې په داسې حال کې کړې دي، نوموړی په خپلو کمپایني غونډو کې ادعا کوي چې پاکستان یې په تېرو پنځو کلونو کې له اقتصادي پلوه له سختو مجبوریتونو سره مخ کړی دی تر دې چې تورخم بندر به پاکستان پخوا پر کابل د فشار لپاره تړلو، مګر اوس یې مجبورا ۲۴ ساعته پرانیست.