غني ۲۰۱ میلیونه افغانۍ په کمپاینونو لګولي او نبیل د خپل لګښت راپور نه ورکوي

تاند، سه شنبه، د عقرب ۷مه: د ټاکنو کمېسیون د کمپاینونو په موده کې د نوماندانو د لګښتونو مالي راپورخپور کړ چې ښيي د اشرف غني ډلې تر ټولو زیات مصارف کړي دي.

په دې راپور کې چې نن سه شنبه نشر شوی په کې راغلي چې د ۱۸ نوماندانو له منځه ۱۰ نوماندانو د خپلو لګښتونو راپور ورکړی چې ټول لګښتونه یې ۲۴۱ میلیونه، ۶۵۵ زره او۲۹۰ افغانۍ کېږي.

له دې منځه د ډاکټر غني ډله له ۲۰۱ میلیون، ۱۶۰ زره او ۵۱۳ افغانیو په مصرفولو تر ټولو لومړۍ اود غلام فاروق نجرابي ټاکنیزه ډله د ۱۸۶ زره ۵۰۰ افغانیو په مصرفولو تر ټولو وروستۍ ټاکنیزه ډله ده.

راپور ښيي چې عبدالله عبدالله د ۲۰ میلیونه،۹۹۷ زره او ۶۴۵ افغانیو په لګولو دویم مقام کې ځای لري.

همدا راز په راپور کې د حکیم تورسن مصارف درې میلیونه، ۲۸۳ زره او ۳۳۹ افغانۍ، د عبداللطیف پدرام مصارف یو میلیون، ۲۳۸ زره او ۹۶۸ افغانۍ، د عنایت الله حفیظ ټاکنیز لګښتونه ۳ میلیونه، ۸۹۵ زره او ۳۷۵ افغانۍ، د سید نورالله جلیلي کمپایني لګښتونه ۶ میلیونه او ۷۴۸ زره افغانۍ ښودل شوي دي.

په کمه کټګورۍ کې بیه نورالرحمن لېوال ۴۸۶ زره او ۹ افغانۍ، شهاب حکیمي ۷۱۲ زره او ۱۳۱ افغانۍ او همداراز نورالحق علومي ۲ میلیونه، ۹۷۳ زره او ۸۱۰ افغانۍ په خپلو کمپایني چارو لګولې دي.

د کمېسیون په راپور کې ویل شوي چې رحمت الله نبیل، فرامرز تمنا، شیدامحمد ابدالي، احمدولي مسعود، ګلبدین حکمتیار، محمد ابراهیم الکوزي، حنیف اتمر او زلمي رسول ورته د خپلو کمپایني لګښتونو راپور تر اوسه نه دی ورکړی.

د ټاکنو کمېسیون په داسې حال کې د نوماندانو د کمپایني لګښتونو لیست خپور کړی چې د دوه میاشتنیو کمپاینونو پر مهال یې هر نوماند ته ۴۴۲ میلیونه افغانۍ وروستۍ حد پر کمپایني لګښتونو لپاره ټاکلی و.