سعودي عربستان د هیواد په بیلابیلو ولایتونو کې اته زره زیانمنو کورنیو سره ۵۰ زره کیلو ګرامه غوښه مرسته وکړه
سعودي عربستان نن د وري میاشتې په ۱۲مه نېټه په بېلابیلو زیانمنو ولایتونو کې سیلاب ځپلو، داخلي بیځایه شویو، بیرته راستنیدونکو، معلولینو او مستحقو کورنیو سره ۵۰ زره کیلو ګرامه د مرسته شوې غوښې د ویش لړۍ پیل کړه.
د یادې مرستې شوې غوښې د ویش په پرانیستغونډه کې د مالیې وزارت د عوایدو او ګمرکونو معین ښاغلي عبدالله رقیبي، په افغانستان کې د سعودي عربستان سفارت مرستیال او یو شمېر خیریه ټولنو ګډون کړې وو.
د مالیې وزارت د عوایدو او ګمرکونو معین په هیواد کې له زیانمنو کورنیو سره د سعودي عربستان د سخاوتمندانه مرستې څخه د مننه وکړه.
یاده مرسته شوې د وري غوښه به مالیې وزارت د نورو خیریه ټولنو په همکارۍ ۳ زره کیلو ګرامه په غزني، ۳ زره کیلو ګرامه په لوګر، ۵ زره کیلو ګرامه په فراه، ۵ زره کیلو ګرامه په هرات، ۵ زره کیلو ګرامه په هلمند، ۷ زره کیلو ګرامه په کابل، ۵ زره کیلو ګرامه په فاریاب، ۱۰ زره کیلو ګرامه په کندهار او ۷ زره کیلو ګرامه په ننګرهار ولایتونو کې۸۰۰۰ مستحقو کورنیو ته وویشي.
د یادونې وړ ده چې سعودي عربستان هر کال د حج د قربانۍ غوښې د اضاحي پروګرام له لارې چې د اسلامي پراختیایې بانک له لوري اداره کیږي اسلامي هیوادونو ته لیږدوي چې سږ کال ۵۰ زره کیلو ګرامه یې افغانستان ته ورکړل شوه.