اجرائیه رئیس ډاکټر عبدالله د جی ۷+ ډلي له مهم شخصیت شانانا ګووماو سره د افغانستان پر سوله باندي وږغېدی

تاریخ: 4 جوزا 1395

کابل افغانستان : د افغانستان د اسلامي جمهوریت اجرائیه رئیس ډاکټر عبدالله عبدالله نن د ترکیې په استانبول کي د نړیوالي بشري سرمشریزي په څنډو کي د G7+ ډلي له مهم شخصیت شانانا ګووماو سره د افغانستان پر سوله او امنیت باندي هر اړخیز بحث وکړی.

نوموړي په ننۍ ناسته کي وویل، چي افغانستان په تیرو کلونو کي د پرمختګونو ترڅنګ لا هم د امنیت په ګډن له یو شمېر ستونزو سره مخ دی، چي باید ورته په مختلفو سطحو کي همکاري جلب سي.

اجرائیه رئیس د افغان حکومت د هغو هڅو په اړه، چي په تیرو کلونو کي یې د سولي په اړه کړي بحث وکړی او زیاته یې کړه، چي په دې لړۍ کي وروسته هڅه د همږغۍ د څلور اړخیز ګروپ ایجاد و.

هغه زیاته کړه، چي د همږغۍ څلور اړخیز ګروپ هم د هیلو سره سم د سولي لپاره نتیجه نه ده ورکړي، ولي افغان حکومت لا هم د سولي لپاره دروازه پرانستې پرې ایښي او دې هڅي ته به دوام ورکوي.

ډاکټر عبدالله د طالبانو د ترورستي ډلي د مشر ملا منصور د وژل کېدو په اړه وویل، چي دا به د سولي په پروسه کي یو نوی باب پرانیزي او هغو طالب قومندانانو ته، چي د سولي د خبرو لپاره لېوال دی، فرصت ورکوي، چي له دې پروسې سره یو ځای سي.

د G7+ ډلي مهم شخصیت شانانا ګووماو د هیواد له اجرائیه رئیس سره په ننۍ لیدنه کي وویل، چي سوله د افغانستان د خلکو اساسي حق دی او دوی د خلکو ددې مشروع حق په تحقق کي هر ډول مرستي ته ژمن دي.

هغه زیاته کړه، چي جی۷+ به د افغانستان د سولي په پروسه کي د حکومت د هڅو د ملاتړ وکړي او د سیمي په کچه به له هغو هیوادونو او ادارو سره کار وکړي، چي په سوله کي اساسي رول لوبولای سي.

نوموړي په دې برخه کي د دوه اړخیزو او څو اړخیزو ناستو او ګډ کار وړاندیز هم وکړی او په دې برخه کي یې له خپله اړخه هر راز همکارۍ لپاره چمتووالی وښود.