تاند، چهار شنبه، د عقرب ۸مه: د افغانستان د ملي امنیت شورا وايي، د کونړ په ناړۍ کې جګړه د پاکستان د خودخواهۍ نتیجه ده او افغانان به د خپل حریم او خاورې د ساتلو لپاره په جدیت مبارزه وکړي.
د ملي امنیت شورا تاند ته په دې اړه په یوه استولې اعلامیه کې د حمدالله محب له قوله ویلي، د کونړ د ناړۍ په جګړه د امنیتي سکټور له مشرانو سره تېره ورځ سه شنبه ناسته او مشورې هم شوې دي.
حمدالله محب وايي، د کونړ په ناړۍ کې د ډیورنډ پر فرضي کرښه روانه جګړه د پاکستان د خودخواهۍ نتیجه ده، خو ټینګار یې کړی چې د پولې پر سر راپورته کېدونکو مسایلو ته به جدي توجه کېږي.
د کونړ په ناړۍ ولسوالۍ کې د اوونۍ له پیل راهیسې د پاکستاني پوځیانو او افغان ځواکونو نښتې روانې دي چې تر اوسه په کې پاکستاني لوري د شپږو پوځیانو په ګډون د خپلو ۱۱ کسانو ژوبله منلې او افغان لوري ته هم درې مېرمنې او شپږ نور ملکیان ټپيان شوي دي.