محسن داوړ د پاکستان د امنیتي ځواکونو له خوا ونیول شو

تاند – د پاکستان امنیتي ځواکونو د پښتون ژغورنې د غورځنګ یو مخکښ مشر، محسن داوړ ایډوکېټ، ونیو او د بنو جېل ته یې روان کړ.

د ټولنیزو رسنیو یوه فعال او د غورځنګ ملاتړي باسط شېراني په خپل فیسبوک لیکلي، چې داوړ د پولیټیکل ایجنټ د ادارې له خوا نیول شوی، د بنو جېل ته روان کړای شوی او د پاکستان د پوځ ګڼ شمېر موټر ورپسې شاته روان دي.

ښاغلي داوړ تېر ماښام /د جون ۶مه/ د شمالي وزیرستان په میرعلي سیمه کې د غورځنګ له برخه والو سره په روژه ماتي کې برخه اخیستې او وینا کړې وه.

وروسته، د غورځنګ په برخه والو د پاکستان امنیتي ځواکونو ډزې کړې وې چې ګڼ شمېر کسان یې په کې ټپیان کړي ول. ویل کیږي چې بیا پاکستاني ځواکونو چاته اجازه نه ورکوله چې د پېښې ټپیان روغتونونو ته ورسوي.

فعالانو د امنیتي ځواکونو چلند د فلسطینیانو په وړاندې د اسراییلي ځواکونو له چلند څخه بدتر بللی وو.

په ټولنیزو رسنیو، د پښتون ژغورنې د غورځنګ فعالانو د محسن داوړ په نیونه خفګان ښودلی او غږ یې کړی چې د داوړ ژوند ته د پېښ خطر مخه دې ونیول شي.

د جون په ۶مه ماښام د غورځنګ یوه بل فعال ډاکټر سید عالم مسود یوې غونډې ته وویل، چې د طالب له نامه څخه یوازې استفاده کېږي او خلک وژل کیږي.

مسود وویل، چې د پښتنو مشرانو له وژنې څخه وروسته به اعلان وشو چې نامعلومو وسله والو ووژل خو په حقیقت کې وژونکي معلوم ول. ویل کیږي، چې د ښاغلي مسود اشاره د پاکستان پوځي او استخباراتي ځواکونو ته وه.

اخوا ته ویل کیږي، چې د جنوبي وزیرستان په مرکز واڼه کې په زرګونو قبایلي ځوانان د غورځنګ د اورژبي مشر علي وزیر د امنیت د خوندي کولو لپاره د هغه د کور خواوشا راټول شوي او د پاکستان د امنیتي ځواکونو او پوځ له خوا حمایه کیدونکیو طالبانو ته اجازه نه ورکوي چې د علي وزیر په کور برید وکړي او ویې نیسي.