تاند- د افغانستان د ملي امنیت منسوبانو نن /سې شنبه/ یو افغان او درې ترک اتباع، چې د ترکیې د حکومت له لوري مشکوک ول، نیولي دي.
د افغان – ترک د ښوونځیو اداره وايي، نیول شوي کسان په افغان ترک ښوونځیو کې ښوونکي ول او د ترکیې د حکومت له لوري د فتح الله ګولین په ډله پورې تړلي معرفي شوي دي.
د ترکیې حکومت فتح الله ګولین، چې په امریکا کې اوسي، د ترکیې د تېر (۲۰۱۶) کال د جولای د میاشتې په ناکامه کودتا کې په لاس لرلو تورنوي.
په افغانستان کې د افغان ترک ښوونځیو ريیس نعمان اردوګان، چې یوه خپلواکه موسسه ده، وايي، هغه چا چې دا درې ښوونکي ونیول ځانونه یې د افغانستان د ملي امنیت د ادارې غړي معرفي کړل.
افغان – ترک لېسې په کابل، جوزجان، مزارشریف، هرات او کندهار کې فعالیت کوي.
دا لېسې لومړی پلا په ۱۹۹۵ م کال د افغانستان په شمال کې پرانیستل شوې او د افغانستان په کچه تر ټولو بریالي ښوونځي ګڼل کېږي.