تاند- د افغانستان استخباراتي چارواکي وايي چې د وسله والو طالبانو د یوه مهم غړي په نیولو سره یې په پلازمېنه کابل کې د یوې لویې تروریستي حمله مخه ډب کړه.
د افغانستان د ملي امنیت ریاست نن وویل، منسوبانو یې نن په پلازمېنه کې د هلمند د نادعلي لپاره د طالبانو ولسوال له درو نورو سخت دریځو سره په یو لړ عملیاتو کې یوځای ونیوه.
د ملي امنیت ریاست وايي چې دا کسان په وروستیو ورځو کې د ډیورنډ کرښې له هغې خوا څخه کابل ته راغلي ول او په دغه ښار کې یې د یوې لویې حملې پلان درلود.
ملي امنیت دغه راز ادعا کوي چې دغو کسانو ته په پاکستان کې د برید روزنه ورکړای شوې وه.
د ملي امنیت ریاست وايي چې ځواکونو یې په فاریاب ولایت کې هم شپږ وسله وال مخالفان نیولي. د ملي امنیت له یوې خبرپاڼې سره سم له نیول شویو طالبانو سره بمونه او وسلې هم کشف شوي دي.