تاند- ملګروملتو په غزني کې د وسله والوطالبانو هغه بمي چاودنه په کلکه وغندله چې په نتیجه کې یې ۱۲ ملکیان ووژل شول.
د شنبې په ورځ د غزني ولایت په ګیرو ولسوالۍ کې ۱۲ تنه، چې په یوه بس کې واده ته روان ول، د سړک د غاړې په بمي چاودنه کې ووژل شول او یو شمېر نور ژوبل شول.
په نیویارک کې د ملګروملتو د مرستندویو چارو د کمېټې رييس نیکولاس هیتم پرون /دوشنبه/ وویل چې د دې پېښې په وژل شویو کسانو کې ۶ ښځې، څلور زلمکي، موټروان او د هغه کلینر شامل دي.
هیتم ویلي:«د افغانستان پر سړکونو بمي چاودنې او یا د سړک د غاړې بمي حملې تېر کال افغانانو ته زیاتې مرګ ژوبلې اړولي دي.»
ده وویل، په تېر یوه کال کې د سړک د غاړې په بمي چاودنو کې ۳۱۲ تنه ملکي افغانان وژل شوي او ۶۹۵ نور ټپیان شوي دي.
د ملګروملتو په وینا یوازې په تېرو ۵ میاشتو کې ۱۰۴ تنه ملکي افغانان د سړک د غاړې په بمي چاودنو کې وژل شوي او ۱۱۸ نور ژوبل شوي دي.
د ملګروملتو د راپور له مخې د سږ کال په لومړیو پنځو میاشتو کې د سړک د غاړې په بمي حملو کې د وژل شویو کسانو فیصدي د تېر کال د ورته مودې په پرتله ۳۹ سلنه زیاته ده.
ملګروملتو د افغانستان د جګړې له ښکېلو خواوو وغوښتل چې له دا ډول غیرانساني عملیاتو ډډه وکړي او داسي هیڅ اقدام ونه کړي چې له کبله یې بېګناه انسانان وژل کېږي یا ټپیان کېږي.