تاند- د هند صدراعظم نریندر مودي د جمعې په ورځ د دغه هیواد په پنجاب ایالت کې وویل چې د هند اوبه باید وړیا پاکستان ته ونه بهېږي.
ښاغلي مودي د پنجاب په بټنډه ښار کې یوې غونډې ته وویل چې د ده حکومت به کروندګرو ته د پرېمانه اوبو د برابرولو لپاره اقدام وکړي.
ده وویل«د اباسین په اوبو کې زموږ د کروندګرو حق دی. حکومت یوه ضربه قوه جوړه کړې چې له پاکستان سره د اباسین د معاهدې پر اساس دغه هیواد ته د بهېدونکو اوبو په اړه څېړنه وکړي او په دې اړه نظر ورکړي چې هند له دغو اوبو څرنګه ډېر تر ډېره استفاده کولی شي.»
پاکستان او هند په ۱۹۶۰ م کال د اوبو د وېش پر سر موافقه لاسلیک کړه.
د دې معاهدې پر اساس له هند څخه د پاکستان پنجاب ته د بیاس، راوي او سوتلج سیندونو کنټرول د هند په لاس کې دی خو د اباسین، چُناب او جهلم واک پاکستان ته ورکړای شوی دی.
هند د اباسین یوازې په سلو کې ۳۰ اوبه کاروي.
خو ښاغلي مودي د هندي پنجاب ایالتي جرګې ته وویل چې حکومت به یې پرېنږدي چې د اباسین یو څاڅکی پاکستان ته وبهېږي او د دې پر ځای به دا اوبه جمو او کشمیر، پنجاب او نورو سیمو ته ورکړي.
ده د هند پر تېرو حکومتونو نیوکه وکړه چې پاکستان ته یې اوبه پرې ایښي او خپل کروندګر یې له اوبو محرومه کړي دي.