تاند- په کابل کې د ناټو قوماندانۍ نن /پنجشنبه/ په یوه خبرپاڼه کې وویل، یو امریکايي پوځي په افغانستان کې وژل شوی دی.
دا پوځي د ناټو ترمشرۍ لاندې د غوڅ ملاتړ ماموریت په چوکاټ کې د افغان امنیتي ځواکونو روزنې او مشورې ته ګومارل شوی و.
ناټو د دغه پوځي نوم او د پېښې علت نه دی څرګند کړی خو ویلي یې دي چې د پېښې په اړه تحقیقات روان دي.
له دې پوځي سره سږ کال په افغانستان کې د امریکا لږترلږه ۶ پوځیان په نفوذي حملو کې وژل شوي دي.
پینتاګون وايي چې په افغانستان کې یې د پوځیانو شمېر ۱۴۰۰۰تنو ته رسېږي.
له دې جلا پرون /چهارشنبه/ د امریکا یوه (C-130) ترانسپورتي الوتکه په افغانستان کې ولوېده او پکې ۱۲ تنه سپاره ووژل شول.
د این بي سي تلویزیون د راپور له مخې، په دې پېښه کې د ۵ امریکايي پوځیانو، ۵ قراردادیانو او ۲ ملکي افغانانو په شمول ۱۲ تنه وژل شوي دي.