تاند، سه شنبه، د میزان ۹مه: د ټاکنو کمېسییون وايي، تر دې دمه د ۳۶۵ ولسوالیو ټاکنیز توکي مرکزونو ته را انتقال شوي او دولایتونو نتایج به ډېر ژر کابل ورکړل شي.
د ټاکنو کمېسیون د دارالانشاء مشر حبیب الرحمن ننګ نن سه شنبه په یو خبري کنفرانس کې وویل، له ټولو ولایتونو څخه اړین مواد کابل ته رسېدلي او د رایو په شمېرنه به ژر کار پيل شي.
نوموړي دغه راز وویل، ټاکل شوې وه چې د رایو شمېرنه د میزان په اوومه پيل شي، خو په وینا یې چې دا کار د ناظرانو د نشتون له کبله ځنډېدلی دی.
دا په داسې حال کې ده چې د ټاکنو کمېسیون پرون دوشنبه د ولسمشریزو ټاکنو د رایو د ارزونې لپاره یو ډیجیټلي مرکز پرانیست خو په دغه مرکز کې لا هم رایه شمېرنه نه ده پيل شوې.