د کندهار په نېښ ولسوالي کې د وسله والو طالبانو په حمله کې ۱۴ پولیس وژل شوي دي.
راپورونه وايي چې وسله والو طالبانو په دې ولسوالي کې ۳ پوستې هم نیولي دي.
تر دې وړاندې وسله والو طالبانو وړمه شپه په فراه کې د پولیسو پر بوستو په برید کې تر ۱۰ زیات پولیس ووژل.
په جنوبي امریکا کې یوه الوتکه، چې د برازیل د یوه فوټبال کلب لوبغاړي هم پکې سپارل ول، په کولمبیا کې ولوېده.
دا الوتکه له بولوویا څخه کولمبیا ته روانه وه چې مډلین ښار ته نژدې ولوېده.
په ناټو کې د روسیې استازی وايي، په افغانستان کې د ناټو د غړیو اقدامات د روسیې د ګټو خلاف دي او له دې کبله مسکو غواړي چې له ناټو تړون سره همکاري بس کړي.
په ولسي جرګه کې د نورستان د خلکو استازی حضرت شاه نورستاني وايي، که د دغه ولایت دوآب ولسوالي ته کومکي ځواک ونه رسېږي، دا ولسوالي د دولت د وسله والو مخالفانو لاس ته لوېږي.
نورستاني د ایران فارس خبري اژانس ته همداراز وویل چې په دې ولسوالي کې ۱۵۰ پولیس د مخالفانو له لوري محاصره شوي دي.
د پاکستان د پوځ نوي لوی درستیز نن په راولپنډۍ کې په یو لړ خاصو پوځي مراسمو کې واک ترلاسه او رسماً په کاب پیل وکړ.
ډګرجنرال جاوید باجوه وروسته له دې د نوازشریف له لوري د پاکستان لوی درستیز وګومارل شو چې د راحیل شریف درې کلنه دوره پوره شوه.
راحیل شریف په دې ستایل شوی چې د پاکستان د اکثرو لوی درستیزانو په شان یې کودتا ونه کړه.
د پاکستان په پارلمان کې د اپوزېشن مشر او د پیپلز ګوند غړي خورشید شاه وايي، که ګوند یې په مظاهرو کې د عمران خان ملاتړ کړی وای، د نوازشریف حکومت به پرزېدلی و.
د پاکستان د پوځ پخوانی لوی درستیز جنرال اسلم بېګ وايي، د افغانستان د حکومت او وسله والو طالبانو ترمنځ دې د سولې خبرې پیل شي.
اسلم بېګ په عین حال کې وویل چې امریکا او متحدانو یې د افغانستان په جګړه کې ماتې کړې خو هغوی پر خپلې ماتې اعتراف ته تیار نه دي.