د غور د ولایت د پوهنې رييس وايي چې نامعلومو وسله والو پرون /چهارشنبه/ دوې ښوونکې وتښتولې.
صبغا الله اکبري وویل، دا دوې ښوونکې د ولایت په مرکز فیروزکوه کې ښوونځي ته روانې وې چې وسله والو نامعلوم لور ته په مخه کړې.
تراوسه د دې پېښې انګېزه نه ده څرګنده شوې او د تښتونکو د هویت په اړه هم څه نه دي ویل شوي.
په غور کې سږ کال تاوریخجنې پېښې زیاتې شوي دي.
په کندهار ښار کې د پولیسو په یوه پوسته کې نن ۴ پولیس ووژل شول.
دا پېښه د ښار په بشران کوټ کې د پولیسو ترمنځ د یوې شخړې په نتیجه کې وشوه.
په دې پېښه کې څو نور پولیس ژوبل شول.
د امریکا متحدو ایالتونو اعلان وکړ چې له بېرته راستنو شویو افغان کډوالو سره ۳۹ ملیون ډالره مرسته کوي.
له دغو پیسو سره په روان ۲۰۱۶ م کال کې له افغان کډوالو سره شوې بشري مرستې ۲۰۷ ملیون ډالرو ته رسېږي.
د جنورۍ له میاشتې تراوسه پوري نژدې یو ملیون افغان کډوال له پاکستان او ایرانه خپل هیواد ته راستانه شوي چې دا په وروستیو کلونو کې په یو وار د ډېرو کډوالو د بېرته راستنېدو ریکارډ دی.
د پاکستان ایکسپریس تریبیون ورځپاڼه ادعا کوي چې د افغان طالبانو په منځ کې د سولې د خبرو د پیلولو په اړه جدي مشورې روانې دي.
ایکسپریس تریبیون ورځپاڼه وايي، د طالبانو یوه مرکچي، د نوم د نه څرګندېدو په شرط د سکایپ له لارې ورته وویل«حاضردمه موږ له بهرنیو خواوو او همداراز له افغان لوري سره د خبرو د پیلولو په باب ږغېږو.»
د افغانستان د ملي امنیت ریاست یا استخباراتو په بګرام کې پر امریکايی پوځیانو د حملې په اړه امریکایانو ته دوه ځلي خبرداری ورکړی و.
افغان سرچینو رویټرز خبري اژانس ته ویلي چې دوی په بګرام کې د کارکوونکو په اړه د معلوماتو غوښتنه وکړه څو مشکوک کسان ومومي خو د دوی غوښتنې ته مثبت ځواب ونه ویل شو.
د افغانستان دفاع وزارت وايي، د ملي اردو ۱۳ سرتېري، چې څه باندې یو کال پخوا په فاریاب ولایت کې وسله والو طالبانو برمته کړي ول، په یو لړ عملیاتو کې خوشي شول.