تاند نیوز ډیسک: په سویډن کې د سولې نړیوال انسټیټیوټ (سپری) په تازه راپور کې ویلي چې په نړۍ کې د نویو اټومي وسلو د جوړولو سیالي ګړندۍ شوې ده.
راپور وايي، په ۲۰۱۸ کال له اټومي هیوادونو سره د اټومي کوپړیو شمېر ۱۳۸۶۵ وو، چې د ۲۰۱۷ کال په نسبت یې ۶۰۰ کوپړۍ کمې وې، خو هغو هیوادونو چې اټومي وسلې یې لرلې، بیا هم د خپلو وسلو د نوي کولو لپاره بودیجه زیاته کړې ده.
په راپور کې له امریکا، روسیې، بریټانیا، فرانسې، چین، هند، پاکستان، اسراییل او شمالي کوریا سره د اټومي وسلو تصدیق شوی دی، خو ویل شوي چې د نړۍ ۹۰ سلنه اټومي وسلې له امریکا او روسیې سره دي.
راپور وايي، دا مهال له ۹ اټومي هیوادونو سره ۲۰۰۰ داسې اټومي کوپړۍ دي چې کله یې هم د کارولو امکان شته.
راپور زیاتوي، سږ کال د جنورۍ تر میاشتې پورې له امریکا سره ۶۱۸۵ او له روسیې سره ۶۵۰۰ اټومي وسلې وې.
د سپری په راپور کې دا هم راغلي چې په ۲۰۱۸ کال کې پاکستان او هند د اټومي ځواک د ډیرولو هڅه جاري ساتلې او دا دواړه هیوادونه به په خپلمنځي سیالۍ کې تر بل کاله پورې لس یا ۱۵ اټومي نور بمونه جوړ کړي.