تاند، جمعه، د میزان ۲۶مه: په هالنډ کې د متقاعدو پوځیانو ټولنې او شمېر مرستندویه بنسټونو د هغه افغان ترجمان ننګه کړې چې ۱۳ کاله یې په افغانستان کې له بهرنیانو سره کار کړی خو اوس له هالنډه شړل کېږي.
په هالنډ کې د متقاعدو پوځیانو ټولنې او شمېر مرستندویه بنسټونو د ټلیګراف په نوم پر یوه پاڼه کمپاین پیل کړی چې دغه افغان دې بېرته خپل هېواد ته نه شړل کېږي او د قبولۍ په تړاو دې یې بیا له سره کتنه وشي.
دغه بنسټونه وايي، په افغانستان کې هغه کسان چې له نړیوالو ځواکونو سره کار کوي د طالبانو او داعش ډلې لخوا د خاین او جاسوس په نامه یادېږي، وژل کېږي، ګواښ کېږي او اړتیا ده چې دوی خوندي وساتل شي.
دا په داسې حال کې ده چې څو میاشتې وړاندې د هالنډ د دفاع وزیر انک بیګلډ اعلان وکړ چې کوم ترجمانان د خطر احساس کوي دوی یې په هالنډ کې هرکلی کوي، خو اوس یو افغان چې په هالنډ کې یې د پناه غوښتنه کړې ده، غوښتنلیک یې رد شوی دی.
دا په داسې حال کې ده چې هالنډیان د افغانستان په ارزګان ولایت کې د ناټو تر چتر لاندې ماموریت مخته وړي او له ۲۰۰۶ کال راهیسې تر ۲۰۱۰ پورې له دغو ځواکونو سره ۱۲۰ افغانانو کار کړی دی.