خبریال: عادل – ځايي امنيتي چارواکي وايي، د دغه ولايت په شمال کې يې د روانو عملياتو په ترڅ کې ۳۳ وسله وال وژلي او ۷ نور يې ټپيان کړي دي.
د هلمند د ۲۱۵ ميوند قول اردو له رسنيز دفتر څخه په يوه خپره شوې خبرپاڼه کې ويل شوي چې په تېره يوه شپه او ورځ کې يې په هلمند کې د روانو ذولفقار په نوم عملياتو کې ۳۳ طالب وسله وال وژلي او اوه تنه نور يې ژوبل کړي دي.
د خبرپاڼې په حواله، د يادو عملياتو په ترڅ کې چې د ملي اردو، ملي پوليسو او ملي امنيت د سرتېرو لخوا پر مخ وړل کيږي ګڼ شمېر سپکې او درنې وسلې هم د امنيتي ځواکونو لاسته ورغلي دي.
تر اوسه وسله والو طالبانو په دې اړه رسنيو ته څه نه دي ويلي.
د تېرو پنځه اونيو را په دېخوا د هلمند په شمال کې د ذوالفقار په نوم پراخ عمليات پيل شوي دي چې ويل کيږي امنيتي ځواکونه په دغه عملياتو کې دومره بريالي نه دي څومره چې تمه کېده.