پوهنه د تيارو رڼاکوونکې او د ژوند د پرمختګونو کيلي ده، پوهنه د بدمرغيو په وړاندې ښه سپر او زغره ده.
د هيواد په ډېری ولايتونو کې د هلکانو تر څنګ د نجونو مکاتب هم فعاله دي، هر کال د کانکور په ازموينه کې د هلکانو تر څنګ په ځينو ولايتونو کې په سلګونو او ځينو نورو کې بیا په سلګونو نجونې برخه اخلي، چې راتلونکې ته د خلکو هيله او اميد پيدا کېږي.
پکتيکا هم د هيواد له څلور دېرشو ولايتونو له ډلې څخه يواځينی ولايت دی، چې سږ کال د کانکور په ازموينه کې د نجونو ګډون صفر و، خو د پکتيکا د پوهنې ريس په يوه مرکه کې ويلي دي، چې په ياد ولايت کې د نجونو لس ښوونځي فعاله دي او په هر ښوونځي کې د نجونو شمېر زرو ته رسېږي.
که د پکتيکا د پوهنې ريس ښاغلي کوچي ځاځي څرګندونو ته فکر وکړو، نو پکتيکا رښتيا هم د تعليم او زدکړې په برخه کې د پام وړ پرمختګ کړی دی، هر څوک په داسې پرمختګ خوشاله او هيله مند کېږي.
که د کوچي ځاځي خبرې حقيقت درلودلی، نو نن به د پکتيکا له ولایت څخه هم په لسګونو پېغلو د کانکور ازموينه ورکړې وای ، خو داسې هيڅ هم نشته.
کوچی ځاځی هم ښايي ملامت نه وي، ځکه چې هوايي مکاتب د هيواد په ټولو ولايتونو کې شتون لري، نو پکتيکا هم د هيواد يو سرحدي ولايت دی، نو هلته به هم د هوايي مکتبونو شمېر زيات وي.
دا چې د دولت په اډانه کې فساد کومه نوې معما نه ده، چې څوک يې په ځواب ورکولو حيران شي، خو دا چې کوچي ځاځي په حقيقن نه ولاړه مرکه د پکتيکا د غيور ولس په سترګو کې د خاورو شيندل دي ، د ياد ولايت په اداري تشکيل کې د نورو ولايتونو د کارکوونکو شمېر زیات دی، نو خود به همدغه کسان د خپل جېب په لټه کې وي، هغوی ته نن د کار فرصت په لاس ورغلی دی، هغوی له سبا وېرېږي، هسې نه سبا بې دندې ورځې وي او دربدره وګرځي، نوځکه نن لا د خپل جېب ډکولو او د بیت المال په پيسو د خپلې خېټې د پړسولو په فکر کې دي.
په پکتيکا ولايت چې ډېر شمېر نورې ستونزې هم په مخکې لري، خو په دې وروستیو کې د کوچي ځاځي خيالي مرکې د خلکو احساسات را پارولي دي، هغوی فکر کوي، چې د پوهنې تجارانو خو د پکتيکا مېشتو ولسونو د مېرمنو په نوم د راغلو پيسو څخه هم ګټه پورته کړې ده، په ټول ولايت کې د ښځينه زده کوونکو شمېر سلو تنو ته هم نه رسېږي.
دا چې له يوه لوري په هيواد کې د ښځو پر وړاندې د کورني تاو تريخوالي قضيې له ورځې بلې ته ډېرېږي، په صحرايي محکمو کې يې محکمې تر سره کېږي، پوزې ترې غوڅېږي.
له بله لوري يې د پوهنې چارواکي لا د تيارو منځ ته ورټېل وهي تر څو د پوهې له خواږه نعمت څخه بې برخې او په راتلونکې هم د پکتيکا والو مېرمنې د سواد له زدکړې څخه لرې پاتې شي.
په ولسي جرګه کې د پکتيکا د خلکو استازو، د پکتيکا د ولايتي شورا درنو غړو، د پکتيکا والي صاحب د ښاغلي کوچي ځاځي دغه خيالي مرکه پکتيکا والو ته د زغم وړ نه ده، باید کوچی ځاځی د دغه مرکې په تړاو وپوښتل شي.
همدارنګه ولسمشره! پکتيکا هغه ولايت دی، چې ټولې رايې يې ستا صندق ته اچولې وې، نو نن د پکتيکاوالو دغه ستونزو ته د حل لاره پيدا او پکتيکا ته د حقيقت موندنې لپاره يو با صلاحيته پلاوی راولېږه تر څو دغه ستونزې ته د پای ټکی کېښودل شي.
پکتيکاوالو ته په يوه اداره کې هم فساد د منلو وړنه دی، خو د معارف او پوهنې په برخه کې فساد ملتونه د تاريکۍ کندې ته غورځوي، چې هغه مهال به بیا ټول مسوولیت ستاسو چارواکو په غاړه وي.