۱۸،۰۳،۲۰۱۴
کلونه پخوا په کابل کې لکه همدا اوس د پسرلي شپې ورځې وې. د رادیو دیارانو په نوښت، د رادیو د پل باغ عمومي په ستدیوګانو کې پسرلنۍ مشاعره جوړه شوه. ټاکل شوې وه چې مشاعره دې د پښتوغزل د پلارحمزه شینواري د دې بیت په اقـتـفا جوړه شي:
چې پسرلی په موسیدوښکاري ښکلې ځواني په غوړیدو ښکاري
مشاعره جوړه شوه.زه دا وخت د زلمیتوب په هسک کې ګرځیدم، زلمي خیالونه مې له ځوانې مستۍ سره لاس په لاس داسې ګرځیدل چې لا په شاهانو او امپراتورانو یې هم خیال نه راووړ. د زلمیتوب په همدې تودو شیبوکې ما هم په دې مشاعره کې ګډون وکړ، شعر مې ورته لیکلی و، یوبیت یې دا دی:
څوپسرلي دي چې دې لارڅارمه راشه چې لارپه ورکیدوښکاري
هغه پسرلی اوهغه شنیلی چې ما غوښتل نه یوازې را نه غلل، بلکې لارې نورې هم تتې شوې، ورکې شوې، رنګارنګ بادونه راوالوتل اوزه هم لکه نور«لارورکي لارویان» پر ورکو لارو سرشوم او دا دی:
« … اوزه بې زړه، بې وطن
ددنیا پای ته رسیدلی یمه
داسې غریب یم،چې نه زړه اونه وطن لرمه
لکه بڼکه سپک یم
که مې باد لږشانتې ور پورې وهي،
نورتر اوبولاندې یم.»
اوس هم پرهماغو ورکولاروسر یم،دشنیلیوپه وطن کې ژوندکوم،داسې وطن چې پسرلی،وړی ،منی اوژمی یې تک شین دی،خوما په کې دخپل وطن شنیلی اوپسرلی ورک کړی دی،سترګې مې ورپسې ړندې شوې،خوتراوسه مې پیدا کړی نه دی.
څه موده مخکې مې همدې ورک پسرلي ته دغه دوې څلوریزې لیکلې دي.اوس به یې د۱۳۹۳ ل کال دپسرلي دراتګ له پاره تاسوسره شریکې کړم.ګوندې له کومې خوا نه آغه زما دخوښې وړ ورک پسرلی،زما دوطن له شیرامونو،وږمواوتوتکیوسره راتلونکی پسرلی،داسې راپیدا شي چې دجګړې په بوی باندې بوین نه وي اودباروتوپه لوګي دودغړن نه وي،سترګک راته ووهي اوپه خندا مې خوا ته راشي:
څلوریزه
ټول کلی سپیره دی،لږشنیلــی غــواړم
مـــځـکه مـروره ده،سپـــرلـی غـواړم
درست عمرمې ولید څلوربول هرخوا
ګـرځـم ورپسـې اویـوســړی غـــواړم
۰۴،۱۲،۲۰۱۳
هیدرسلیف
دنمارک
څلوریزه
سترګې مې ړندې شوې په شنیلي پسې
یـمـه ارمـانـجـن پـه خپـل لیمـڅي پسې
وګـرځیـدم،ومـې نـه مونـد هیڅ چیرې
اوس هـم سـرګـردان یم یـوسړي پسې
۰۴ـ۱۲ـ۲۰۱۳
هیدرسلف
ډنمارک