تاند: د بادغیس ولایتي شورا وايي، لویدیځو ولایتونو کې ۴۰ سلنه طالبان ماشومان دي او هر یو یې د میاشتې د ۱۵۰ افغانیو (۱،۸۷) ډالر معاش په بدل کې جنګېږي.
د بادغیس د ولایتي شورا یو غړی عبدالله افضلي وايي، دا مهال د طالبانو له ۳۵ څخه تر ۴۰ سلنې پورې بشري قوه کم عمره هلکان تشکیلوي : ((۳۵ سلنه په طالبانو کې هغه هلکان دي چې عمرونه یې د ۱۴ او ۱۸ کلونو تر منځ دي.))
نوموړي زیاته کړه، هر هغه هلک چې د وسلو د وړلو او د جګړې په ډګر کې د اوسېدو توان ولري، طالبان یې له ځان سره استخداموي او میاشتنی معاش یې هم په تشریفاتي ډول ایله ۱۵۰ افغانۍ وي.
ښاغلي افضلي دغه راز ویلي، بادغیس کې د طالبانو مالي منابع عشر او زکات دی او یا هم له کروندګرو څخه خپله ځانګړې برخه ټولوي: (( طالبان چې هره سیمه نیسي، نو خلک یې باید ټول نظامي حالت کې شي او ددوی ملاتړ وکړي، کم عمره هلکان تر ټولو ستره قوه ده چې طالبانو ته جذبېږي.))
د افضلي په خبره طالبان دغو هلکانو ته هیڅ ډول روزنه نه ورکوي او همدا سبب دی چې د طالبانو په لیکو کې تر ټولو زیات له ۶۰ سلنې څخه تر ۷۰ سلنې پورې تلفات همدغو کم عمره زلمیانو ته اوړي: (( د طالبانو په ډله کې حتی سپین ږیرو خلکو نه هم د ډوډۍ د وړلو راوړلو او نورو وړو وړو کارونو لپاره استفاده کېږي.))
د راپور په اساس بادغیس کې طالبان د قانون په نامه څه نه پېژني او هر هغه امر چې د دوی قومندانان صادروي نو خلک مجبور دي چې پلی یې کړي.
بلخوا د بادغیس امنیتي چارواکي په دې اړه څه ویلو ته حاضر نه شو، خو طالبانو هم په دې تړاو بیا څه نه دي ویلي.