تاند، دوشنبه، د قوس ۱۸مه: ولسمشر غني له ښځو سره د تاوتریخوالي د مخنیوي د کمپاین په وروستیو کې یو فرمان صادر کړی چې له مخې به یې د یو شمېر زنداني مېرمنو د زندان موده راکمېږي او یو شمېر به یې بخښل کېږي.
په دې اړه ارګ په یوه خبرپاڼه کې راغلي، هغه زنداني مېرمنې چې د درېواړو محکمو له لوري تر دریو کلونو پورې په زندان محکومې شوې دي، د نوي فرمان له مخې به خوشې کېږي.
په فرمان کې همدا راز د هغو ښځو د زندان موده هم راکمه شوې چې له ۳ کلونو تر ۳۰ کلونو پورې په زندان محکومې دي.
راپورونه وايي، ولسمشر دا فرمان په داسې حال کې ورکړی دی چې دا مهال ۸۰۰ مېرمنې د افغانستان په زندانونو کې بندیانې دي، دغه راز دا لومړی ځل دی چې افغان حکومت پر ښځو د تاوتریخوالي د مخنیوي په برخه کې ګام پورته کوي او له دریو کلونو څخه په کم بند محکومې مېرمنې له زندانونو خوشې کوي.