تاند، دوشنبه، د دلوې ۲۱مه: ولسمشر غني د ښاري نړیوال فورم په څنډه کې په ابوظبۍ ښار کې د متحده عربي اماراتو د باندنيو چارو او نړيوالو همکاريو له وزير شيخ عبدالله بن زايد ال نهيان سره کتلي.
ارګ وايي، په دې ليدنه كې دواړو خواوو د ستراتیژيکو اړيکو او همداراز د افغانستان او متحده عربي اماراتو ترمنځ د سوداګريزو او اقتصادي مناسباتو پر پراختيا او سيمه ييزو مسايلو بحث وكړ.
بلخوا تېر مازديګر د ملګرو ملتونو د سرمنشي مرستيالې او د يو اېن هبيتات موسسې اجرايوي رئيسې ميمونې محمد شريف هم په متحده عربي اماراتو كې له افغان ولسمشر سره ليدلي دي.
هغې ژمنه كړې، چې په افغانستان کې به د دې ادارې فعاليتونه د ښاري پراختيا د لومړيتوبونو پر بنسټ تنظيم شي او دوى به په ياده برخه کې پر يوې طرحې کار وکړي او هغه به له افغان حکومت سره شريکه کړي.