تاند- ولسمشر محمد اشرف غني تېره شپه د کابل په سردار محمد داوود خان روغتون کې د هغو ټپیانو پوښتنې ته ورغی چې د ګردېز د یوه جومات په وروستۍ تروریستي حمله کې ژوبل شوي دي.
ارګ وايي، د سردار محمد داوود خان روغتون ډاکترانو د ټپیانو د روغتیايي وضعیت او درملنې په اړه ولسمشر ته معلومات ورکړل.
ولسمشر په خپله هم له ټپیانو سره خبرې وکړې او ویې ویل چې حکومت به د دوی ویجاړ شوی جومات بېرته جوړ کړي.
ده ډاکترانو ته هدایت وکړ چې تر وسه وسه د ټپیانو په درملنه کې هڅه وکړي.
د وروستیو معلوماتو پر اساس د ګردېز د خواجه حسن د سیمې د جمعې د ورځې /اګست ۳/ په دوو انتحاري بریدونو کې، چې پر یوه جومات کې وشوې، لږترلږه ۳۴ تنه شهیدان شوي او تر ۷۰ ډېر نور ژوبل شوي دي.