د افغانستان د اسلامي جمهوریت جمهوررئیس محمداشرف غني نن ماښام د اجرائیه رئیس ډاکټر عبدالله عبدالله په مشرۍ په پکتیا ولایت کې د وروستي تروریستي برید څېړونکي پلاوي سره په ارګ کې وکتل.
په دغه کتنه کې چې د پکتیا والي شمیم کټوازي هم حضور درلود، په پیل کې پکتیا ولایت ته تللي پلاوي د یاد ولایت پر امنیه قوماندانۍ د تروریستي برید په اړه جمهور رئیس ته د خپلو موندنو راپور وړاندې کړ.
یاد پلاوي وویل، د پکتیا ولایت پر امنیه قومندانۍ او د پولیسو په تعلیمي مرکز د وروستي تروریستي برید له امله زیانمې شوي ودانۍ بېړنۍ بیا رغونې ته اړتیا لري.
د پکتیا والي شمیم کټوازي د ټپیانو درملنې او د شهېدانو کورنیو ته د جمهوررئیس د ځانګړي پاملرنې مننه وکړه وې ویل: د پکتیا ولسونو تل د ملي یووالي حکومت ملاتړ کړی او پرون یې ټپیانو ته د خپلو وینو په ورکولو سره د هغوی ژوند وژغوره.
کټوازي وړاندیز وکړ چې د پکتیا ولایت امنیه قومندانۍ، د پولیسو تعلیمي مرکز او د ولایت زیانمې شوي ودانۍ دې په بېړني ډول ورغاول شي. هغه زیاته کړه حکومت باید د ټپیانو او شهیدانو له کورنیو سره د مرستې امکانات برابر او هغوی ته رسیدګي وکړي.
شمیم کټوازي وویل، پکتیا ولایت په هره برخه په ځانګړي ډول د امنیت د ښه تامین، پرمختګ او انکشاف په برخو کې زیاتې پاملرنې ته اړتیا لري.
جمهوررئیس غني یو ځل بیا د پکتیا والي او د یاد ولایت ولسونو ته د پروني تروریستي برید له امله د تسلیت او غمشریکي ترڅنګ د ملي فاع، کورنیو چارو، ښارجوړولو او مالیې وزارتونو او د سیمه ییزه ارګانونو خپلواکې ادارې مسوولینو ته لارښوونه وکړه چې ددغه تروریستي برید له امله د زیانمنو شویو ودانیو د بیارغونې په برخه کې هراړخیزه بېړني اقدامات وکړي.
جمهوررئیس د هېواد امنیتي او دفاعي مسوولینو ته د ګردېز ښار د امنیت د ټینګښت لپاره لازمې لارښوونې وکړې. همدارنګه یې د پکتیا ولسونو او والي ته ډاډ ورکړ چې حکومت به په انکشافي برخه کې دغه ولایت ته بېړنۍ بسته منظور کړي.