د۱۳۹۳ لمریز کال د وري۱۹مه
د هېواد د پوهنتونونو د استادانو د سراسري اتحادیې غړو د افغانستان له جمهوررئیس حامد کرزي سره په کتنه کې د کانکور د آزموینې په سیستم کې د اصلاحاتو د رامنځته کولو غوښتنه وکړه.
په دغه کتنه کې چې نن غرمه په ارګ کې ترسره شوه، په داسې حال کې چې د لوړو زده کړو وزیر او د دغه وزارت د مشرتابه پلاوی هم حاضرو، د هېواد د پوهنتونونو د استادانو د سراسري اتحادیې غړو په هېواد کې د کانکور په اوسنی سیستم کې د اصلاحاتو د رامنځته کولو غوښتنه وکړه.
دوی همدا راز د لوړو زده کړو د وزارت له تشکیل څخه د باندې د کانکور د آزموینې د اخیستلو لپاره د یوې خپلواکې کمیټې د جوړیدو غوښتنه وکړه.
جمهوررئیس کرزي د هېواد د پوهنتونونو د استادانو د سراسري اتحادیې د غړو د نظرونو او وړاندیزونو له اوریدو وروسته د لوړو زده کړو وزیر ته لار ښوونه وکړه چې د کانکور د آزموینې په سیستم کې د اصلاحاتو د رامنځته کېدو او د کانکور د آزموینې د اخیستلو لپاره دې د یوې خپلواکې کمیټې د جوړیدو لپاره یوه هر اړخیزه طرحه د کابینې غونډې ته وړاندې کړي ترڅو له مخې یې لازم تصمیم ونیول شي.
دا محترم استادان دا ۱۳ کاله چیری وو چی اوس کرزی صاحب کډی بارولو ته تیاری نیسی او دوی د کانکور په سیستم کی د اصلاحاتو غوښتنه کوی. د استادانو لپاره پکار وه چی د راتلونکی ولسمشر اشرف غنی سره یی دا ستونځی شریکی کړی وای او یو څو ورځی یی نور هم صبر کړی وای.