تاند- ټاکل شوې ده چې د کابینې د بشپړولو لپاره کاندید وزیران نن /شنبه/ له ولسي جرګې څخه د اعتماد رایې د ترلاسه کولو لپاره معرفي شي.
سره له دې چې حکومت وايي، د پوهنې او کلتور له وزیره پرته د ټولو سرپرستو وزیرانو په ځای کاندید وزیران ولسي جرګې ته معرفي کوي، د ولسي جرګې ځینې غړي د حکومت دا خبره ردوي او وايي چې باید د بهرنیو چارو د وزارت لپاره هم نوی وزیر ورمعرفي کړي ځکه چې صلاح الدین رباني پخوا لا د دوی له لوري رد شوی دی.
خو حکومت ظاهراً د بهرنیو چارو وزیر سرپرست نه بولي او د ولسي جرګې هغې پرېکړې ته اعتنا نه کوي چې پر اساس یې ښاغلی رباني سلب اعتماد شوی دی.
ټاکل شوې ده چې د پارلماني چارو وزیر د دفاع وزارت لپاره طارق شاه بهرامي، د کورنیو چارو وزارت لپاره ویس احمد برمک، د کار او ټولنیزو چارو وزارت ته فیض الله ذکي، د کانونو او پیترولیم وزارت ته نرګس نهان، د ترانسپورت وزارت ته حمید طهماسي، د لوړو زده کړو وزارت ته نجیب الله خواجه عمري، د مخابراتو او معلوماتي ټکنالوژۍ د وزارت لپاره شهزاد اریوبي، د کلیو د پراختیا او بیارغونې وزارت ته مجیب الرحمان کریمي او د قومونو او سرحدونو د وزارت لپاره شفیق ګل اغا شېرزی معرفي کړي.
حاضردمه ابراهیم شینواری د پوهنې وزارت سرپرستي کوي او ښاغلی باوري د اطلاعاتو او کلتور سرپرست وزیر دی.
حکومت وايي چې د دواړو وزارتونو لپاره به کاندیدان وروسته ولسي جرګې ته معرفي کړي خو د بهرنیو چارو وزارت لپاره د کاندید په باب څه نه وايي.
د بهرنیو چارو وزارت سرپرست صلاح الدین رباني د جمعیت ګوند مشر دی چې په حکومت کې تر ټولو زیاته ونډه لري او لېري کول یې اسانه کار نه برېښي.