تاند- د پاکستان صدراعظم نوازشریف د شنبې په ورځ ژمنه وکړه چې د سولې خبرو ته د طاللبانو په حاضرولو کې به د افغانستان له ولسمشر محمد اشرف غني سره مرسته وکړي.
د افغانستان ولسمشر څه موده مخکې افغان طالبانو ته بلنه ورکړه چې د سولې خبرې ورسره وکړي.
طالبانو تل د افغانستان له حکومتونو سره د سولې له خبرو سره مخالفت کړی دی او ویلي یې دي چې یوازې هغه مهال خبرې کوي چې ټول بهرني پوځیان له افغانستانه ووځي.
د پاکستان صدراعظم د شنبې په ورځ له طالبانو سره د سولې د خبرو په باب د افغان ولسمشر د وړاندیز ملاتړ وکړ، ویې ویل چې د سولې بهیر باید د افغانانو په مالکیت او مشرۍ وي.
ده وویل:«زه په کلکه دا وایم چې سوله ییز، د ثبات خاوند، متحد او سوکال افغانستان د پاکستان په خیر دی. د افغانستان او پاکستان اړیکې خاص اهمیت لري. زموږ ورورګلویزې اړیکې ګډ دین، خپلوي او ګډ تاریخ لا پیاوړې کوي. زموږ امنیت او نېکمرغي هم سره تړلې ده.»
ولسمشر غني د پاکستان ولسمشر نوازشریف وستایه او د دوو هیوادونو ترمنځ د تېر په هېر د غوښتنې ترڅنګ په اړیکو کې د نوي باب د پیلولو غوښتنه وکړه.
ده وویل چې زموږ راتلونکې باید ماضي خرابه نه کړي.