تاند، دوشنبه، د عقرب ۶مه: پاکستاني رسنیو راپور ورکړی چې د پاکستان په رتودیرو سیمه کې د یو ډاکټر لخوا ډېرو کسانو ته په ایچ آی وي د ککړ سرنج او پیچکارۍ کارولو له کبله نږدې ۱۰۰۰ تنه ماشومان په ایډز اخته شوي دي.
مسوولان وايي، د پنجاب په رتودېرو سیمه کې د مظفر ګانګرو په نوم د ماشومانو د ډاکټر له لاسه ۱۱۱۲ کسان په ایډز تازه اخته شوي دي چې له دې منځه یې ۹۰۰ تنه ماشومان دي.
د چارواکو په خبره رتودیرو د بې وزله خلکو سیمه ده چې یوازې یو ډاکټر یې د مظفر ګانګرو په نوم درلود او هغه په ایډز ککړه پیچکارۍ ټولو ناروغانو ته کاروله.
د راپورونو په اساس له اپریل میاشتې راهیسې تر اوسه په رتودیرو سیمه کې ۳۵ ماشومان د ایډز له ناروغۍ مړه شوي دي.
په پاکستان کې د رسمي شمېرو له مخې ۱۶۵ زره انسانان په ایډز اخته دي او دا شمېره ورځ تر بلې لوړېږي.