پر ډېورنډ خندق کښل او د افغانیت توږل؛ پر یوه وخت/هارون حکیمي

د کرزي په (۱۳) کلنه توره له فساداو مافیایي کړیو ډکه دوره کې افغانانو ته په لوی لاس ډېر مادي او معنوي زیانونه ور واړول شول . جهاد هم افغانانو وکړ ، کور هم د افغانانو په کې وران شو ، په کې مړه او ژوبل هم افغانان شول ، د تاریخ په هره مقطع کې تورو او سرو یرغلګرو لښکرو ته هم افغانانو غاښ ماتوونکي ګوزارونه او ماتې ور کړې ، له واکه هم افغانان په کې ووتل او پر ځای یې تش په نامه دوهم لمبر افغانان چې مور یا پلار یې د بل قوم او یا بل مذهب وو د واک پر ګدیو ور کښېنول شول . هو ! د استعمار ملاتړ به ځکه له دغه ډول لاسپوڅو سره ؤ چې ددوی په دغه مجهول هویت کې به د استعمار ګټه وه . او استعمار ته به یې کار کاوه . دا په دې مانا چې پلار به یې پښتون ؤ، خو مور به یې افشارۍ ، یا د کوم بل قوم وه . دغه کم اصله او کم ذاته عناصرو ته به چې د استعماري قووتونو پر مټ واک ورسېد ، نو بیا به یې نه تور کتل او نه سپین . یوازې خپل ځان او خپل بادار ته به یې کار کاوه ، او بس نور خو یې هر څه د خپل واک پر مهال ور ختم کړل ، خو اوس یې د افغانانو بې هویتۍ ته ملا تړلې او غواړي چې د خپلو بادارانو په دستور د تل له پاره افغانان بې هویته کړي . برښنایي تذکرې وېشل پر ځای خبره ده ، خو چې د هر افغان هویت په مکمله توګه په کې لیکل شوی وای . اوس چې خبره یوازې په افغان کلمه کې را لنډه شوې ده ، نو داخو ښکاره خبره ده چې د کمپیو ټر په یوه بټن به بله ورځ د ټولو افغانانو هویت له نېستۍ سره مخ کړي . او دا به هېڅ نه مالومېږي چې پښتون څوک دﺉ ؟ تاجیک څوک دي ؟ نورستانې څوک دﺉ ؟ هزاره څوک دﺉ ؟ هندو او سک څوک دﺉ ؟ قذلباش او ایماق څوک دي ؟ اساعیلیه څوک ، او ددوی اصلي نفوس څومره دﺉ ؟ دا ټولې د کرزي خان لاسته راوړنې دي ځکه څو کاله مخکې خو ځینې سیاسي پښتون ضد کړیو یعنې د ښاغلي کرزي ماما خېلو دا هم ویل چې پښتانه د نورو قومونو په پرتله په اقیلت کې دي ، او د پښتونو له (۶۲٪) څخه یې انکار کاوه . نو چې دا کار هم وکړي د پښتون هویت به د ابد له پاره په کې ورک کړي ، دا یوه پښتون ضد توطیْه ده چې د پردیو په دستور په افغانستان کې عملي کېږي . خو پښتانه پرې پوه دي چې په راتلونکو نظامونو کې له واکه د پښتنو د ګوښه کېدو او چورلټ ایستلو له پاره دا کار تر سره کېږي . ځکه چې له یوې خوا پر پښتنو باندې پردۍ جګړه ورتپل شوې ، او له بله اړخه له تعلیم څخه لیرې وساتل شول . او په ښکاره له لوړو زده کړو ایسارېږي . خو بل لور ته په نظام کې ځای نه ور کول کېږي . او د اصلي افغانانو ځای یاپه ګینۍ ور ډک کړي ، او یا په سومبۍ .