په افغانستان کې د ایران او چین د نښلونکې پټلۍ سروې روانه ده

افغانستان په اوسنیو شرایطو کې سیمه ییزو او نړیوالو لارو ته سخته اړتیا لري ، شرط په کې دادﺉ چې نړیوال او سیمه ییز هېوادونه یوازې د خپلو ګټو له پاره د افغانستان خاوره ونه کاروي ، او نه داسې چې د خپلو بې کیفیته توکود پېر او پلور په خاطر له افغان خاورې خپل مصرفي مارکېټ جوړ کړي او افغانان د تل له پاره له خپلو تولیدي توکو محروم وساتي . دا د نړۍ په هېڅ قانون کې نه شته . اېران تل د تاریخ په اوږدو کې له افغانستان او افغانانو سره همدا لوبه پر مخ وړې او تل یې د افغانانو د کورنیو تولیدي پروژو او بندونو جوړولو مخه نیولې ده . دوی او پاکستان دواړه غواړي چې د افغانستان خپلې اوبه په یو شکل د ځان کړي ، تر څو د برښنایي او زراعتي تولید څخه بې برخې پاتې شي ، نو د رېل په پټلۍ کې به له دوی څخه پرته له زیان اړولو څه ګټه افغانانو ته ورسېږي ؟ که دوی له یوې خوا د رېل پټلۍ په افغانستان کې جوړه کړي ، له بل پلوه به د اېران له لوري فرهنګي او مذهبي یرغل افغانستان ته راروان وي . ځکه ددې تضمین یې څوک کوي چې دوی به فرهنګي یرغل پر افغانستان باندې نه راوړي ؟ او نه به چین ته ددې لاره هواروي چې د افغانستان خاوره ددې پټلیو په نښلولو سره د غرب په وړاندې د جنګي سیالیو میدان جوړ کړي . هو! دوی به خامخا د خپل خصلت له مخې همدا کار کوي چې افغانستان به د خپلو موخو له پاره کاروي، باج به پرې اخلي ، ګټه به یې ددوی وي او تاوان به یې تل افغانان ګالي .