تاند- هغه امریکايي پوځي چې پرون /شنبه/ په کابل کې د یوه نفوذي په حمله کې ووژل شو، د متحدو ایالتونو د یوټا ایالت د شمالي اوګدن ښاروال و.
شمالي اوګدن ښار ۱۷ زره نفوس لري.
د ناټو تر مشرۍ لاندې د غوڅ ملاتړ ماموریت وايي، حمله کوونکی د افغانستان د امیتي ځواک غړی و او پر برینټ ټایلر له ډزو سره سم د یوه بل افغان له لوري وویشتل شو.
د شمالي اوګدن ښار د شورا غړي فیلیپ سوانسن د ټایلر وژل کېدا تایید کړه.
سالټ لېک تریبیون او نورو رسنیو پرون /شنبه/ راپور ورکړ چې د شمالي اوګدن ښاروال ۳۹ کلن برینټ ټایلر له ملي ګارد سره د خدمت په ترڅ کې وژل شوی دی.
د امریکا په سنا جرګه کې د اوټا سناتور او د دې ایالت څو نورو چارواکو هم د ټایلر وژل کېدا تایید کړه.
ټایلر په ۲۰۰۹ کې د شمالي اوګدن د ښاروالۍ شورا غړی شو او ۲۰۱۳ م کال ښاروال غوره شو.
دی د سږ کال په جنورۍ کې د یوټا ایالت له ملي ګارد سره افغانستان ته واستول شو. هماغه وخت ده سیمه ییزو رسنیو ته ویلي و چې د افغان کومانډو کنډک د سلاکار په توګه به کار وکړي.
په وروستیو ورځو کې په افغانستان کې نفوذي حملې بیا زیاتې شوي دي.