تاند- د امریکا په لوېدیځه ویرجنیا کې یو ډاکتر ونیول شو چې له استعمال شوې پیچکاریو یې کار اخیست.
د لوېدیځې ویرجنیا چارواکو د جمعې په ورځ د ډاکتر رونالډ چالیفوکس د کلینیک لایسنس یا جواز وروسته له دې فسخه کړ او ډاکتر یې ونیوه چې د نوموړي په کلینیک کې استعمال شوې پیچکارۍ وموندل شوې او ثابته شوه چې له یوې پیچکارۍ بیا کار اخلي.
د لوېدیځې ویرجنیا د روغتیا ادارې ویلي چې ډاکتر چالیفوکس پنځلس ورځې وخت لري چې د استیناف غوښتنه وکړي.
د روغتیا ادارې له خلکو غوښتي چې که د ۲۰۱۰ میلادي کال را په دې خوا یې په دغه کلینیک کې پیچکاري کړي وي، خپله وینه دې معاینه کړي.
دوی وايي چې دا کار ځکه ضروري دی چې د پیچکارۍ له لارې هیپتایت C او B او دغه راز د ایډز ویروس (ایچ آی وي) سرایت کوي.
د دې خبر اهمیت زموږ لپاره په دې کې دی چې زموږ ډاکتران او درملتونونه په ښکاره له یوې ستنې څو تنو ته پیچکاري ورکوي.