تاند- له لبنان څخه ورکړای شوي خبرونه وايي چې په پلازمېنه بیروت کې د ایران پر سفارت برید شوی او لږترلږه ۲۳ تنه وژل شوي خو ایران وايي چې د دوی سفارت ته نژدې چاودنه شوې او په ترڅ کې یې د ایران د سفارت کلتوري اتشه وژل شوی دی.
چاودنه د بیروت په جناح نومې سیمه کې وشوه چې د ایران سفارت پکې موقعیت لري.
له چاودنې وروسته امنیتي ځواکونو سیمه کلابنده کړه.
په راپورونو کې ویل شوي چې شاوخوا ۱۴۶ تنه ژوبل شوي دي.
په بیروت کې د ایران سفیر غضنفر رکن ابادي د لبنان المنار تلویزیون ته ویلي چې د سفارت کلتوري اتشه ابراهیم انصاري وژل شوی دی. ده د نورو ایرانیانو د وژل کېدو په اړه څه ونه ویل.
د ایران سفیر اسراییل په دې حمله کې په لاس لرلو تورن کړ.
راپورونه وايي چې لومړۍ چاودنه سفارت ته نژدې وشوه خو دوهمه د سفارت د ودانۍ مخته وشوه او د سفارت ودانۍ یې سخته زیانمنه کړه.