تاند- د افغانستان په شمال ختیځ کې د زلزلې د ټکانونو په اثر لږ ترلږه ۴ تنه وژل شوي او شاوخوا ۱۰۰ کورونه زیانمن شوي دي.
د تخار ولایت د پولیسو ویندوی خلیل اسیر وویل، په دې زلزله کې، چې تېره شپه دوه نیمې بجې وشوه، د تخار ولایت د رستاق ولسوالۍ دوه کلي زیانمن شوي دي.
اسیر وویل:«د زلزلې سختو ټکانونو د رستاق ولسوالۍ په خواجه خیراق او پیسته مزار کلیو کې څلور تنه وژلي دي.»
د اسیر په وینا لومړني معلومات د څلورو تنو د وژل کېدو ښودنه کوي خو امکان شته چې د تلفاتو شمېر تر دې زیات وي.
ده همداراز وویل چې زلزلې تر ۱۰۰ زیات کورونه نړولي یا زیانمن کړي دي.
ژغورونکي ډلې سیمې ته د مرستې لپاره استول شوي دي.
په ۱۹۹۷ میلادي کال په تخار ولایت کې په زرګونو تنه د زلزلې په اثر وژل شوي و.