تاند- د اروزګان ولایت په مرکز ترینکوټ کې تېره شپه په موټرسایکل بمي چاودنه کې لږترلږه ۱۴ تنه ژوبل شول.
د اروزګان د ولایتي روغتون مسوولان وايي چې ۱۴ ټپیان وروړل شوي دي.
د اروزګان د پولیسو چارواکي لږترلږه د ۱۲ تنو ټپي کېدا تاییدوي او وايي چې چاودنه د ښار په یوه ګڼ مېشته سیمه کې د شپې په ۸ بجې وشوه.
د دوی په وینا په ټپیانو کې ۴ پولیس او ۸ ملکیان دي.
په ټپیانو کې څو تنه ماشومان هم شامل دي.
خو د روغتون ډاکتران وايي چې ۱۴ ټپیان وروړل شوي چې د یوه حال نازک دی.
په همدې سیمه کې، چې تېره شپه چاودنه وشوه، تر اختر دوې ورځې وړاندې هم د موټرسایکل په وسیله په چاودنه کې ۸ تنه ژوبل شوي ول.