تاند- د خیبر پښتونخوا په سوات کې پولیسو پنځه تنه د یوې شپږ کلنې نجلۍ په ودولو کې د لاس لرلو په تور نیولي دي.
د پولیسو یوه افسر داوود خان وویل، د سوات د باخېلې د کلي دوې کورنۍ پر یوه شپاړس کلن هلک د شپږ کلنې نجلۍ په ودولو کې لاس لري.
ده وویل، پولیسو پر کلي چاپه ووهله او د زوم، د هغه د پلار او د واده د مراسمو د ترتیبوونکي په شمول یې پنځه تنه ونیول.
دوه نور نیول شوي کسان د ونکاح شاهدان دي.
داوود خان وویل چې پولیس اوس د نجلۍ په پلار پسې ګرځي چې له سیمې څخه تښتېدلی دی.
نجلۍ د کلي مشرانو ته سپارل شوې. پولیس وايي مخکې تر دې چې دوسیه سیمه ییزې محکمې ته وړاندې کړي د قضیې په اړه نوره څېړنه کوي.
د ماشومانو ودول خو لویه ګناه ده چی د دی کار مخنیوی باید د قوانینو په تصویب او پراخ تبلیغاتی کار او دخلکو په پوهولو سره وشی. اما زمونږ په پښتنو کی تر دی ډیر نور کارونه د اسلام او بشریت خلاف صورت نیسی چی مخه یی باید ونیول شی . مثلا د نجونو ورکول په بدو کی یا د نجونو بدلول چی بیا وروسته د دو نازنینو کورنیو ژوند تل په غمونو لړلی وی. د ډیر زیات ولور غوښتل او د واده په مراسمو کی بیځایه لګښتونه ټول د کورنیو په اوږو دروند بار دی چی پدی هکله قومی جرګی او قوانین کولای شی له ځوانانو سره مرسته وکړی تر څو په راتلونکی کی هوسا او خوشحاله ژوند ولری.