تاند- په فاریاب ولایت کې د جمعیت او جنبش ګوندونو ترمنځ سخته نښته شوې او په لړ کې یې لږترلږه ۱۰ تنه وژل شوي دي.
فاریاب د جنرال عبدالرشید دوستم په مشرۍ د ملي اسلامي جنبش د نفوذ سیمه ده.
د راپورونو له مخې د جمعیت او جنیش د دوو قوماندانانو ترمنځ نښته د فاریاب په المار ولسوالي کې شوې ده.
د بلخ والي عطا محمد نور په خپله فېسبوکپاڼه کې ویلي چې په فاریاب ولایت کې د جنبش د غړیو د جمعیت ګوند د ځوانانو مشر زمان الله قاطع او د هغه ورور وژلي دي.
نور همداراز لیکلي چې، قاطع، چې د جمعیت یو مهم قوماندان و، تېره شپه له خپل ورور فاروق قاطع سره یوځای د جنیش له غړیو سره په جګړه کې وژل شوی دی.
عطا محمد نور په یوه جلا اعلامیه کې، چې د جمعیت ګوند د اجرايي شورا د ريیس په توګه یې خپره کړې ده، ویلي دي چې قاطع د ولسي پاڅون کوونکو قوماندان و او تېره شپه په المار ولسوالي کې د طالبانو د برید له ځپلو وروسته په هغه حمله کې ووژل شو چې په فاریاب کې د جنرال عبدالرشید دوستم خاص استازي قوماندان نظام الدین، قوماندان حنیف الماري او قوماندان شمال په ګډه د ده پر پوستو وکړه.
خو د فاریاب والي سید انور سادات د عطا محمد نور ادعا رد کړې او ویلي یې دي چې جګړه د دوو قوماندانانو ترمنځ شوې ده.
ده ویلي، له المار ولسوالي څخه یو شمېر بې ځایه شویو خلکو غوښتل چې بېرته خپلو مېنو ته ستانه شي خو د څو قوماندانانو له مخالفت سره مخامخ شول.
سادات وايي چې له دې مسلې وروسته د دوو قوماندانانو ترمنځ نښته وشوه.
د فاریاب د والي په وینا د المار امنیه قوماندان د جمعیت ګوند غړی دی او ده په خپله هڅه کړې چې د دوو قوماندانانو ترمنځ جګړه پای ته ورسوي.
د فاریاب والي ښاغلي سادات تایید کړه چې په دې جګړه کې ۱۰ تنه وژل شوي او شاوخوا ۱۵ نور ژوبل دي.
د ده په وینا په وژل شویو کسانو کې ۸ تنه د جنبش او ۲ د جمعیت دي.
د فاریاب والي د بلخ د والي عطا محمد نور د څرګندونو په اړه وویل چې پکار نه ده چې له لېري څوک قضاوت وکړي او دا ډول څرګندونې د ده په وینا د جنیش او جمعیت ترمنځ اختلاف نور هم زیاتوي.
د فاریاب والي د دواړو قوماندانانو شخړه د دوی ترمنځ د پخوانیو اختلافاتو نتیجه وبلله او ویې ویل چې دوی په ځلونو له یو بل سره نښتې کړي دي.