د غه سيالۍ چې د هېواد د خپلواکۍ د څلورنوييمې کليزې په وياړ د اطلاعاتو او فرهنګ وزارت لخوا پر لاره اچول شوې وې، پکې د پلازمېنې کابل په ګډون د هېواد له ٣٤ ولايتونوڅخه ٥٠٠ تنه فرهنګيانو ګډون کړى ؤ، چې د ميدان وردګو ولايت څخه څلورو تنو ته د اطلاعاتو او فرهنګ وزير ډاکټر سيد مخدوم رهين لخوا ٣ تنو ته يې د لومړۍ او يو تن ته يې دويمې کټګورۍ جايزې او ستاينليکونه ورکړل شول.
په يادو سياليو کې چې د روان کال د وږي په ٣١ نيټه د مطبوعاتو په نړيوال تالار کې يې مراسم تر سره شول پکې د اطلاعاتو او فرهنګ وزير ډاکټر سيد مخدوم رهين سربېره ، د اطلاعاتو او فرهنګ وزارت د مالي او اداري چارو مرستيال پوهنمل غلام نبي فراهي، د فرهنګي چارو معين سيد مصدق خليلي او د ياد وزارت ګڼ شمېر رئيسانو ، د هېواد بېلابېلو ليکوالانو اود ادب مينه والوګډون درلود. په مراسمو کې د تکړه شاعرعبدالحليم همت شعري ټولګې ( ځوړندې کرښې) لومړى مقام، د وتلي ليکوال ننګيار نا اشنا طنزي اثر ( هو صېب نه صېب) لومړى مقام ، د ځوان شاعر ګل رحمان رحماني تاريخي ناول (د ازادۍ ليونى) لومړى مقام او د هڅاند شاعرليکوال او ژورنالست حکيم بشارت ادبي اثر(سر کونډو ) دويم مقام ترلاسه کړ، چې په ټولييزه توګه د ميدان وردګو ولايت څلورو تنوليکوالانو ته ادبي جايزې ورکړل شوې او د ميدان وردګو ولايت د هېواد په کچه لومړى ولايت ؤ، چې په دومره لوړه کچه يې ٤ تنو ليکوالونو ته نغدي ډالۍ او ستاينليکونه ور کړل شول.
د ميدان وردګو والي ښاغلی عبدالمجید خوږیاڼی یادو څلور تنو ته د دې ولایت د ټولو ادارو په استازۍ د مبارکۍ ترڅنګ دغه ډالۍ د دې ولايت د ولسونو دفرهنګي بډاينې بېلګه بولي او وياړي چې د ميدان وردګو فرهنګيان او شاعران د هيواد د استقلال په سياليو کې لومړى مقام تر لاسه کوي.
د یادونې وړده له دې وړاندې د اسلامي تمدن د پلازمينې په توګه دغزني د جشن په مراسمو کې هم ميدان وردګو ولايت دويم مقام ترلاسه کړى ؤ.
په درنښت
د میدان وردګو ولایت مطبوعاتي