د څه دپاسه ۶ میلیونو افغانیو په ارزښت په یو شمیر دولتي تعلیمي موسسو او د عامې روغتیا په روغتون کې په برېښنايي عصري سیسټم جوړې کمپیوټر خونې ګټې اخیستنې ته وسپارل شوې.
دغه ۱۰۰ پایې کمپیوټرونه چې ۳۰ یې د لغمان پوهنتون، ۲۰ يې د روښان عالي لېسې، ۲۰ یې د مستورې د انجونو د عالي لېسې، ۲۰ یې د قرغیو عالي لېسې او ۱۰ یې د عامې روغتیا روغتون لپاره ځانګړي شوي ول او څه دپاسه ۶ میلیونه افغانۍ لګښت پرې راغلی و تیره ورځ ماسپخین د لغمان سرپرست والي ډاکتر فضل الله مجددي، د مخابراتو او معلوماتي ټکنالوجۍ وزارت مرستیال محمد ایمل مرجان، د پوهنې وزارت تدریسي مرستیال ډاکتر محمد همایون جیلاني، د ولایتي ادارې یو شمیر چارواکیو او قومي مشرانو له لوري د یوې غونډې وروسته ګټې اخیستنې ته وسپارل شول.
دغه کمپیوټرونه چې د ال ان ون په نوم یادېږي په ټولو تدریسي موادو سمبال او دغه تدریسي توکي یې په مخ پاڼه( سکرین ) کې شتون لري چې د انټرنیټ له لارې د افغانستان او نړۍ د نورو ښوونځیو او کتابخانو سره د وصلیدو قابلیت لري چې زده کوونکي به وکولی شي په اسانۍ سره له دې لارې نوي معلومات تر لاسه کړي.
دغه کمپیوټرونه د مخابراتو او معلوماتي ټکنالوجۍ په مرسته چمتو شوي ول چې د یو تړون له مخې د پوهنې او لوړو زده کړو وزارتونو ته په وړیا توګه په واک کې ورکړل شول
لغمان سرپرست والي ډاکتر فضل الله مجددي په خپلو خبرو کې د اسلام له پلوه د زده کړو او نوې ټکنالوجۍ په ګټو او ارزښت رڼا واچوله او د نړیوالتوب په دې حساسه دوره کې یې د ټکنالوجۍ د زده کړو لپاره د یاد وزارت دغه ګام اغیزمن په ګوته کړ او زیاته یې کړه چې د نوي نسل د ښې او باکیفیته پوهونې لپاره داسې نورو پروګرامونو ته په خپله کاري اجندا کې لومړیتوب ورکړي.
بیا د یادو وزارتونو مرستیالانو په خپلو اړونده برخو کې د همکارئ او لا نورو پروګرامونو د پلي کیدو په برخه کې د ولایت مقام ته ډاډ ورکړ.
د یادونې ده چې تر کابل وروسته لغمان لومړنۍ ولایت دی چې په دا رنګه کمپیوټرې او انټرنیټي عصري وسایلو سمبال کمپیوټر خونې په کې ګټې اخیستنې ته سپارل کیږي.